ໂອລາ BlackEyes ຈົົນງົງ ຖືກດ່າ”ໄປຕາຍ” ທີ່ບອກຄ່າອັດເພງ ລາຄາ “2 ລ້ານກີບຕໍ່ເພງ”

ໂອລາ BlackEyes ຈົົນງົງ ຖືກດ່າ”ໄປຕາຍ” ທີ່ບອກຄ່າອັດເພງ ລາຄາ “2 ລ້ານກີບຕໍ່ເພງ”

ຄວາມງົງບັງເກີດ ເມື່ອໜຸ່ມ ໂອລາ ວົງ BlackEyes ຖືກຜູ້ທີ່ສົ່ງຂໍ້ຄວາມມາຖາມລາຄາອັດເພງຕອບດ້ວຍຂໍ້ຄວາມທີ່ບໍ່ສຸພາບ ຫຼັງຈາກບອກລາຄາອັດເພງວ່າ ເພງໜຶ່ງ 2 ລ້ານກີບ.

ໂອລາ BlackEyes ເຜີຍພາບໜ້າຈໍສົນທະນາຈາກແອັບພລິເຄຊັນ WhatsApp ລົງໃນເຟສບຸກສ່ວນຕົວເມື່ອວັນທີ 11 ກໍລະກົດ 2020 ເຊິ່ງເປັນຂໍ້ຄວາມທີ່ມີຜູ້ສົນໃຈຈະອັດເພງສົ່ງເຂົ້າມາຖາມລາຄາ ເລີ່ມຕົ້ນດ້ວຍຄຳຖາມວ່າ “ສະບາຍດີ ສົນໃຈຢາກອັດເພງ ລາຄາເທົ່າໃດ? ເພງຂ້ອຍແຕ່ງເອງແລ້ວ ມີແຕ່ຊິອັດ”.

ໜຸ່ມນັກຮ້ອງດັງຄົນນີ້ກໍກ່າວສະບາຍດີ ແລະ ບອກລາຄາໄປວ່າ ຄ່າອັດເພງແມ່ນ 2 ລ້ານກີບຕໍ່ເພງ ເຊິ່ງອີກຝ່າຍກໍຕອບກັບມາເປັນພາສາໄທວ່າ “ອັດເພງດຽວ 2 ລ້ານ?” ແລະ ໂອລາ ກໍຕອບຢືນຢັນວ່າລາຄານັ້ນແທ້ ແຕ່ຊໍ້າພັດຖືກອີກຝ່າຍຕອບກັບມາດ້ວຍຂໍ້ຄວາມບໍ່ສຸພາບວ່າ “ໄປຕາຍ” ແລະ “ພໍ່ມຶງຕາຍ”.

ທັງນີ້ ໜຸ່ມໂອລາກໍບໍ່ໄດ້ກ່າວຫຍັງຕໍ່ ແຕ່ໄດ້ເອົາໜ້າຈໍສົນທະນາດັ່ງກ່າວມາໂພສລົງໃນເຟສບຸກສ່ວນຕົວ ພ້ອມທັງລະບຸຂໍ້ຄວາມວ່າ “ຕອບຄວາມຈິງກໍຖືກດ່າ. ບອກວ່າແພງໂພດກະໄດ້ນາ. ກະຄືວ່າບໍ່ໄດ້ເອົາແພງເນາະ.”

ຫຼັງຈາກທີ່ໂພສຮູບດັ່ງກ່າວ ກໍມີຜູ້ເຂົ້າມາສະແດງຄວາມເຫັນກັນເປັນຈຳນວນຫຼາຍ ລວມທັງເພື່ອນດາລາສິລະປິນຮ່ວມວົງການຫຼາຍຄົນ ວ່າງົງກັບການຕອບຄຳຖາມດັ່ງກ່າວເຊິ່ງບໍ່ສຸພາບ ແລະ ບໍ່ໃຫ້ກຽດກັນ.

ແລ້ວທ່ານຜູ້ອ່ານຄິດວ່າ ຄ່າອັດເພງລາຄາ 2 ລ້ານກີບຕໍ່ເພງ ແພງ ຫຼື ບໍ່? ແລະ ຄວນຕອບແນວໃດຖ້າເຮົາຮູ້ສຶກວ່າຄ່າບໍລິການແພງເກີນໄປ?

ຂອບໃຈພາບຈາກ : Ola Khampasong

admin