ຊື້ງໃຈຫຼາຍ…ການປັບໂຕເອງເຂົ້າຫາຄົນຮັກນັ້ນ ເຮົາຕ້ອງປັບຕົວເຂົ້າຫາຜູ້ໃຫຍ່ພ້ອມ

ຊື້ງໃຈຫຼາຍ…ການປັບໂຕເອງເຂົ້າຫາຄົນຮັກນັ້ນ ເຮົາຕ້ອງປັບຕົວເຂົ້າຫາຜູ້ໃຫຍ່ພ້ອມ

“ປັບໂຕເອງເຂົ້າຫາຄົນຮັກວ່າຍາກແລ້ວ ປັບຄອບຄົວໃຫ້ຮັກຄົນຂອງເຮົາຍາກກວ່າ”

ພໍ່ເຖົ້າບໍ່ລົມລູກເຂີຍ ແມ່ຍ່າບໍ່ມັກລູກໄພ້ ເປັນອິຫຍັງທີ່ເຮັດໃຫ້ຄູ່ຮັກລຳບາກໃຈຫຼາຍ ເຖິງແມ່ນວ່າສ່ວນຕົວຄູ່ຮັກທັງສອງຄົນຈະເຂົ້າໃຈກັນດີປານໃດກະຕາມ ຖ້າຫາກຜູ້ໃຫຍ່ບໍ່ເຫັນດີເຫັນງາມ ການທີ່ຈະດຳເນີນຊີວິດຄູ່ກະລຳບາກ ເພາະຄວາມຜິດພາດ (ຫຼືອາດຈະບໍ່ເປັນຕາຜິດເລີຍ) ເລັກໆນ້ອຍໆ ກະອາດຈະກາຍເປັນເລື້ອງໃຫຍ່ໄດ້

ບົດຄວາມນີ້ຍາວອີກຕາມເຄີຍ ແລະ ຂອບໃຈທຸກຄົນເດີ້ ທີ່ອ່ານຈົນຈົບ

ສ່ວນຕົວຂ້ອຍໄດ້ເຫັນປະສົບການເຫຼົ່ານີ້ຕັ້ງແຕ່ອາຍຸປະມານ 14-15 ພໍຈື່ຄວາມໄດ້ ໄດ້ຍິນຜູ້ໃຫຍ່ເຄີຍເວົ້າໃຫ້ຟັງວ່າ ອ້າຍນັ້ນໄດ້ລູກເຂີຍບໍ່ເປັນຕາສິແຕກ, ສາວນັ້ນຜິດກັນກັບແມ່ຍ່າຈົນໄດ້ຍ້າຍເຮືອນໜີ, ພໍ່ເຖົ້າໄລ່ລູກເຂີຍອອກບ້ານ ຈັ່ງຊັ້ນຈັ່ງຊີ້ຫຼາຍກໍລະນີ ສ່ວນໃຫຍ່ສັງເກດເຫັນວ່າມັນເກີດຢູ່ 3 ກໍລະນີ

– ຄວາມແຕກຕ່າງຂອງຖານະ ຜູ້ທີ່ເປັນພໍ່ແມ່ ແນ່ນອນວ່າຢາກໃຫ້ລູກສາວໄດ້ດີ ມີຜູ້ເບິ່ງແຍງທີ່ສົມຖານະ ສົມກຽດສັກສີ ເອົາລູກສາວຕົນເອງໄປແລ້ວຈຶ່ງບໍ່ລຳບາກຂາດເຂີນ ຂະເຈົ້າຈຶ່ງຄາດຫວັງວ່າລູກເຂີຍ ຫຼື ຖານະຂອງທາງບ້ານລູກເຂີຍ ຢ່າງຂີ້ລ້າຍສຸດໃຫ້ມີຖານະເທົ່າກັນ ຫຼືດີກວ່ານັ້ນ ກະຖານະດີກວ່າ. ກໍລະນີນີ້ເຫັນວ່າສ່ວນຫຼາຍຜູ້ຊາຍຕົກທ່າຮັບ ເພາະຖ້າຕົນເອງບໍ່ໝັ້ນຄົງໃນໜ້າທີ່ການງານ ຫຼື ຖານະ ການທີ່ຈະຊະນະໃຈພໍ່ເຖົ້າແມ່ເຖົ້າຄົງຈະລຳບາກແດ່

– ນິດໃສ ແລະ ການແຕ່ງກາຍ ຖ້າຜູ້ໃຫຍ່ທີ່ບໍ່ສົນເລື້ອງຖານະຂອງຄົນທີ່ຈະມາເປັນຄູ່ຊີວິດຂອງລູກຕົນເອງແລ້ວ ລຳດັບຖັດມາຈະແມ່ນນິດໃສ ແລະ ການແຕ່ງກາຍກ່ອນເຊັ່ນ: ເປັນຄົນດຸໝັ່ນບໍ່?, ຈິງໃຈຈິງຈັງບໍ່? ສູ້ວຽກສູ້ງານບໍ່? ຕິດຫຼິ້ນຕິດທ່ຽວບໍ່? ລັກສະນະຄຳເວົ້າ ແລະ ມາລະຍາດສຳຄັນຫຼາຍ ເພາະເວລາເຈິໜ້າຜູ້ໃຫຍ່ ຖ້າໂຕນີ້ ຜ່ານ ຖືວ່າມີແວວເຂົ້າຕາກຳມະການແລ້ວ ແຕ່ກ່ອນຈະໄດ້ອ້າປາກສະແດງເຖິງນິດໃສທີ່ແທ້ຈິງ ເຮົາຈະຖືກຜູ້ໃຫຍ່ສະແກນການແຕ່ງກາຍກ່ອນ. ທັງນີ້ທັງນັ້ນ ໂດຍພື້ນຖານຜູ້ໃຫຍ່ມີຄວາມເຊື່ອທີ່ວ່າ ການແຕ່ງກາຍ ບົ່ງບອກເຖິງນິດໃສ ແນ່ນອນວ່າເຖິງຈະເປັນຄົນດີ ມີລະບຽບກະຕາມ ຖ້າມາແບບບ່ອງຫູ, ເຈາະຄິ້ວ, ສັກລາຍ, ຂາເດ໋ບບບບຈົນສິຫາຍໃຈບໍ່ອອກ ຕົ້ນທຶນຄວາມດີຈະຫຼາຍປານໃດກະແມ່ນຖືກຕິດລົບກ່ອນເລີຍ. ຖ້າວ່າທີ່ລູກໄພ້ມາແບບຈັດເຕັມ ປານໄປເດີນແບບ ເສື້ອຜ້າໜ້າຜົມຄົບຊຸດ ກະສິຖືກຕີລາຄາໄປກ່ອນວ່າ ເປັນຄົນຮັກສວຍຮັກງາມ ແຕ່ສິບົວລະບັດຮັກສາລູກຊາຍເຮົາໄດ້ບໍ່ເດ້…ກໍລະນີນີ້ ທັງຝ່າຍຍິງ ແລະ ຝ່າຍຊາຍ ຕົກທ່າຮັບເທົ່າໆກັນ

– ຄວາມຮັກທີ່ບໍ່ຢາກແບ່ງໃຫ້ໃຜ. ພໍ່ແມ່ຖະໜອມລູກຄືກັບແກ່ນຕາ ຮັກສາລູກຄືກັບຫົວໃຈ ເອົາໃຈໃສລູກຄືຮ່າງກາຍ ມັນກະສິມີແດ່ຫັນລະ ທີ່ຢ້ານໄພ້ ຫຼື ເຂີຍ ມາຍາດຄວາມຮັກ ຄວາມເອົາໃຈໃສ່ຈາກລູກໄປ ປະມານວ່າ ຕັ້ງແຕ່ໄດ້ຜົວມານິ ລູກກະບໍ່ໄປກິນເຂົ້ານອກກັບພໍ່ຄືແຕ່ກີ້ເນາະ ອີກຝ່າຍກະສິປະມານວ່າ ແຕ່ກີ້ຫັນນ່າາາາາຢາກໄດ້ນັ້ນໄດ້ນີ້ມັນແລ່ນມາກອດມາເນາະໆແນະໆນຳແມ່ ບາດມີເມຍແລ້ວມັນກະລືມແມ່ລະເດະ! ຄວາມນ້ອຍໃຈອັນນີ້ ບາງຄັ້ງກະເປັນປັນຫາໃຫ້ຄູ່ຮັກ ແຕ່ບໍ່ເທົ່າກັບສອງອັນທີ່ກ່າວມາຂ້າງເທິງ

ເພື່ອກຽມພ້ອມກ່ອນການແຕ່ງງານ ແລະ ເພື່ອຮັບປະກັນວ່າປັນຫາເລື້ອງສາຍສຳພັນຂອງສອງຄອບຄົວຈະໄປກັນໄດ້ ປອງດອງກັນດີ ຂ້ອຍຈຶ່ງທຽວໄປຢ້ຽມບ້ານແຟນຂ້ອຍ(ໃນຕອນນັ້ນ)ຢ່າງເປັນປະຈຳ (ເກືອບທຸກອາທິດ) ພານາງ ວາລິສາ ແຟນຂ້ອຍມາຫາພໍ່ແມ່ຕັ້ງແຕ່ອາທິດທີ 2 ຄົບຫາກັນ. ໄປມາຫາສູ່ກັນເລື້ອຍໆ ຈົນລຶ້ງເຄີຍ ເຂົ້າໃຈ ແລະ ຍອມຮັບເຊິງກັນແລະກັນ ຈຶ່ງສາມາດຕັດສິນໃຈໄດ້ວ່າເລື້ອງການແຕ່ງງານ ມີຄວາມເປັນໄປໄດ້ ແລະ ຈະເດີນໄປໄດ້ດ້ວຍດີ ເພາະຄອບຄົວເຮົາທັງສອງຕ່າງຍອມຮັບ ແລະ ສະໜັບສະໜຸນກັນ.

ການໄດ້ສຶກສາສະພາບຄອບຄົວຂອງກັນແລະກັນ ກ່ອນຈະຂະຫຍາຍຄວາມສຳພັນຂຶ້ນອີກລະດັບເປັນເລື້ອງທີ່ດີ ແລະ ຄູ່ຮັກຄວນປະຕິບັດ ເພາະມັນຈະຊ່ວຍໃຫ້ເຮົາເຂົ້າໃຈຄວາມຕ້ອງການ ແລະ ຄວາມຄາດຫວັງຫຼາຍໆຢ່າງ ທີ່ຜູ້ໃຫຍ່ມີຢູ່ໃນໃຈ ຈາກນັ້ນຈຶ່ງປະເມີນວ່າ ເຮົາເອງມີສັກກະຍາພາບ ທີ່ຈະສ້າງຄອບຄົວໄດ້ບໍ່? ປະມານວ່າຖ້າຈະເຮັດທຸລະກິດ ຄວນສຶກສາແຜນທຸລະກິດກ່ອນ ຖ້າມີກຳໄລດີຈຶ່ງລົງທຶນ ຖ້າຄວາມສ່ຽງສູງຄວນພິຈາລະນາໃຫ້ຮອບຄອບຕື່ມ ສວນໃຫຍ່ຈີບກັນແຕ່ສອງຄົນ, ລົມກັນກະສອງຄົນ, ກິນເຂົ້າກະສອງຄົນ ແຕ່ເມື່ອຮອດຍາມແຕ່ງງານ ມັນບໍ່ແມ່ນສອງຄົນຫັນຕິລະ ມີປັນຫາກັນບາດທ້າຍ ຂັນໝາກບໍ່ມາ ພັນລະຍາບໍ່ເກີດ ກະຊໍ້າໃຈກັນເອົາຊື່ໆ ແລະທີ່ສຳຄັນມັນເສຍເວລາ ແລະ ຄວາມຮູ້ສຶກໄປແລ້ວເອົາຄືນບໍ່ໄດ້ ຫຼັງໆໄປຮອຍແຕກແຫງນ້ອຍໆ ຈະກາຍເປັນປັນຫາອື່ນໆຕາມມາ

ຖ້າສະພາບຄອບຄົວບໍ່ເອື້ອອຳນວຍ ຫົວເດັດຕີນຂາດຜູ້ໃຫຍ່ກະບໍ່ມັກ ແນ່ນອນວ່າມັນເປັນຄວາມທໍລະມານໃຈທີ່ສຸດຂອງຄູ່ຮັກ!!

ແລ້ວຈະເຮັດຈັ່ງໃດ???

ສ່ວນຕົວຂ້ອຍຄິດວ່າ ເອົາແທ້ໆແລ້ວຄວາມຮັກເປັນເລື້ອງຂອງສອງຄົນ ຖ້າມີປັນຫາ ຄວນເອີ້ນກັນມາລົມມາປຶກສາໃຫ້ກະຈ່າງແຈ້ງ ຫຼື ອີກວິທີໜຶ່ງ ຖ້າໝັ້ນໃຈວ່າຈະຮ່ວມທຸກເສບສຸກຮ່ວມກັນຈົນວ່າລະສຸດທ້າຍແລ້ວ ຈຸງແຂນກັນອອກບ້ານ ໄປສ້າງຊີວິດຄອບຄົວຂອງຕົນເອງເລີຍ ຖ້າໃຈກ້າພໍ ພ້ອມຮັບພາລະທີ່ຈະເຂົ້າມາ ເພາະຖ້າບໍ່ເຮັດແບບນີ້ ກະຕ້ອງທົນທຸກກັບຄວາມບໍ່ເຂົ້າໃຈກັນຕໍ່ໄປແບບບໍ່ຮູ້ຈົບ.

ໃນມຸມມອງສ່ວນຕົວ

-ຖານະດີ ເປັນຕົວຊ່ວຍໃຫ້ຫຼາຍໆຢ່າງມັນງ່າຍຂຶ້ນ ອັນນີ້ຂ້ອຍບໍ່ປະຕິເສດ ແຕ່ມັນບໍ່ໄດ້ໝາຍຄວາມວ່າຊີວິດຄູ່ຈະໄປລອດ ເພາະຖ້າວ່າຖານະເງິນຄຳຊ່ວຍເລື້ອງນີ້ໄດ້ ທາຍາດຫ້າງດັງຂອງໄທທີ່ກຳລັງເປັນຂ່າວໃນຕອນນີ້ ຄົງຈະບໍ່ເລີກກັນກັບແຟນສາວ!, ຄູ່ດາລາ Hollywood ທີ່ລວຍລະດັບ 1000ລ້ານ ຄືສິບໍ່ຢ່າງຮ້າງ ເບິ່ງກັນໃກ້ໆ ບ້ານເຮົາກະມີ ຈັດງານບັກໃຫຍ່ ຈ່າຍໄປກະຫຼາຍ ສຸດທ້າຍຢ່າຮ້າງກັນ ປີສອງປີ ຄະດີຢ່າຮ້າງຕິດທ໋ອບ 5 ຂອງປະເທດລາວ ຖ້າຂ້ອຍເດົາບໍ່ຜິດ

ຂ້ອຍວ່າສິ່ງສຳຄັນຄືຄວາມເຂົ້າໃຈກັນຂອງສອງຄົນ ແຕ່ຢ່າງຂີ້ລ້າຍທີ່ສຸດ ກ່ອນຈະແຕ່ງງານ ຂໍໃຫ້ມີວຽກເຮັດງານທຳທີ່ສຸດຈະລິດ ມີລາຍຮັບເຂົ້າມາເປັນປົກກະຕິ ມີໜ້ອຍບໍລິຫານຕາມໜ້ອຍ ໄດ້ມາຫຼາຍກະໃຫ້ຮູ້ເກັບທ້ອນ ຊີວິດຈະຄ່ອຍໆດີຂຶ້ນເອງ.

ພໍ່ແມ່ກໍມີສ່ວນກ່ຽວຂ້ອງ ໃນຄວາມຄິດຂ້ອຍຄິດວ່າພໍ່ແມ່ຄວນຈະຊ່ວຍເຫຼືອຊຸກຍູ້ຢ່າງສຸດກຳລັງ ເພື່ອອານາຄົດຂອງທັງສອງ ຢ່າເອົາຄວາມຄາດຫວັງຂອງຕົນເອງ ໄປເປັນກຳແພງໃຫ້ລູກໆປີນ ມັນຈະເຮັດໃຫ້ລູກໆລຳບາກຂຶ້ນຕື່ມ. ລູກໆມີທາງເລືອກຂອງເຂົາເອງ ຜູ້ເປັນພໍ່ແມ່ຄວນຊ່ວຍເຫຼືອຈົນວາລະສຸດທ້າຍ ນັ້ນໝາຍເຖິງພໍ່ແມ່ໄດ້ເຮັດໜ້າທີ່ທີ່ສົມບູນແລ້ວ. ລ້ຽງລູກເທົ່າທີ່ຢາກລ້ຽງ ໃຫ້ລູກເທົ່າທີ່ສົມຄວນໃຫ້ ທີ່ເຫຼືອໃຫ້ເຂົາໄດ້ຊອກຮູ້ ຫາປະສົບການເອງ ຜ່ານທຸກຜ່ານຍາກເອງ ຄອບຄົວຈຶ່ງມີພູມຕ້ານທານທາງສັງຄົມທີ່ດີ ເພາະການໃຫ້ຫຼາຍເກີນໄປ ອາດຈະສ້າງຄວາມສະບາຍຈົນເຄີຍໂຕ ເມື່ອຮອດຍາມລຳບາກ ແລະ ບໍ່ມີພໍ່ແມ່ແລ້ວ ອາດຈະເພິ່ງພາໂຕເອງບໍ່ໄດ້

ຖານະທາງສັງຄົມ ເປັນພຽງຕົວຊີ້ວັດຄວາມສະດວກສະບາຍຂອງການໃຊ້ຊີວິດ ແຕ່ຄວາມເຂົ້າໃຈ ແລະ ຄວາມສະບາຍໃຈ ບົ່ງບອກເຖິງຄວາມສຸກ ແລະ ສາຍສຳພັນທີ່ດີຂອງຄອບຄົວ

ສ່ວນຕົວຂ້ອຍສົ່ງເສິມໃຫ້ຄູ່ຮັກຮູ້ຈັກ ຮັກແບບມີການວາງແຜນ ເພື່ອຫຼຸດຜ່ອນຄວາມບໍ່ເຂົ້າໃຈກັນ ແລະ ເຂົ້າໃກ້ຄວາມສຳເລັດຂອງຄອບຄົວຮ່ວມກັນ ເພາະຖ້າຂາດການວາງແຜນ ແລະ ການຕັດສິນໃຈຢ່າງຮອບຄອບແລ້ວ ປັນຫາທີຕາມມາພາຍຫຼັງການສ້າງຄອບຄົວຈະກະທົບເປັນວົງກວ້າງ ກະທົບກັບຫຼາຍຝ່າຍ

ອັດສະວິນ ເດວຽງໄຊ

admin