ເປັນໂສດທຸກມື້ນີ້ເພາະວ່າ…ບໍ່ເອົາໃຜ ບໍ່ແມ່ນບໍ່ມີໃຜເອົາ ເປັນໂສດບໍ່ໄດ້ເຫງົາຢ່າງທີ່ຄິດ

ເປັນໂສດທຸກມື້ນີ້ເພາະວ່າ…ບໍ່ເອົາໃຜ ບໍ່ແມ່ນບໍ່ມີໃຜເອົາ ເປັນໂສດບໍ່ໄດ້ເຫງົາຢ່າງທີ່ຄິດ

(ຄືບໍ່ເອົາແຟນມານຳ?) ເປັນຄຳຖາມຂ້າກັນແທ້ໆທັງໆທີ່ເຮົາຍັງໂສດ ໝູ່ລຸ້ນດຽວກັນເຂົາແຕ່ງງານ ມີລູກ ຫຼື ບາງຄົນກໍ່ມີແຟນໝົດແລ້ວ ແຕ່ເປັນຫຍັງເຮົາຄືຍັງໂສດ ແຖມບໍ່ມີແວວວ່າຈະມີແຟນມີຄວາມຮັກດີໆນຳເຂົາຈັກເທື່ອ ໄດ້ແຕ່ໂສດລອຍໄປລອຍມາ ໄດ້ແຕ່ໃຊ້ຊີວິດຄົນດຽວ ກິນເຂົ້າຄົນດຽວ ເບິ່ງໝັງຄົນດຽວ ໄປທ່ຽວຄົນດຽວ ໄຮ້ຄົນຮັກຄອຍເບິ່ງແຍງເທັກແຄ ບໍ່ຄືກັບຄົນອື່ນທີ່ເຂົາໄປໃສກໍໄປເປັນຄູ່ ໂພສຮູບຄູ່ຫວານໆ ຈົນບາງເທື່ອພໍຢາກຄິດບ໋ອກພວກເຂົາພຸ້ນລະ

ແຕ່ຮູ້ຫຼືບໍ່ວ່າບໍ່ໄດ້ມີແຕ່ເຈົ້າເດີ້ທີ່ໂສດຄົນດຽວໃນໂລກ ເພາະດຽວນີ້ຄົນທີ່ຍັງເປັນໂສດແມ່ນມີຫຼາຍພໍໆກັບຄົນທີ່ເຂົາມີແຟນຫັ້ນລະ ເພາະການເປັນໂສດຫຼາຍຄົນລົງຄວາມເຫັນໃນທາງດຽວກັນແລ້ວວ່າ ເປັນໂສດສຸດແສນຈະສະບາຍ ບໍ່ຕ້ອງມາຖ້າຫຶງຫວງໃຜ ບາງຄົນກໍມັກທີ່ຈະໃຊ້ຊີວິດຄົນດຽວໂດຍທີ່ບໍ່ຕ້ອງເອົາໂຕເອົາໃຈໄປຜູກມັດໄວ້ກັບໃຜ, ແຕ່ເຄີຍລອງສັງເກດບໍ່ວ່າ ທີ່ທຸກມື້ນີ້ທີ່ເຮົາ ເຈົ້າ ຂ້ອຍ ທີ່ຍັງໂສດ ບໍ່ມີໃຜເຂົ້າມາໃນຊີວິດ ເປັນຍ້ອນຫຍັງກັນແທ້?

ປານໃດຊິມີແຟນ? ອ້າວ! ຍັງໂສດຢູ່ເບາະນິ? ບໍ່ຄິດຈະມີໃຜຈັກຄົນເທື່ອຫວາ? ປະໂຫຍກທີ່ຄຸ້ນຫູຂອງບັນດາເຫຼົ່າຄົນໂສດທັງຫຼາຍທີ່ເມື່ອໄປພົບຍາດພີ່ນ້ອງ ຫຼືໝູ່ຄູ່ ກໍມັກຈະຖືກຖາມແບບນີ້ຕະຫຼອດ ແຖມເວລາໄປໃສມາໃສກໍຍັງຖືກຕອກຍໍ້າດ້ວຍການເຫັນຄູ່ຮັກກັນ ຍ່າງເປັນຄູ່ຈັບມືກັນຕະຫຼອດ ໂອ໋ຍ! ເຫັນແລ້ວມັນກະຮູ້ສຶກແປກໆ, ເຫງົາໆໃນໃຈຄືກັນໃດ໋ ຢາກມີ Moment ແບບນີ້ນໍາເຂົາແດ່ ຖ້າສາວໆຄົນໃດກໍາລັງມີຄວາມຄິດແບບນີ້ຢູ່ ຢ່າຟ້າວທໍ້ ຫຼືນ້ອຍໃຈໄປເດີ້ ເຖິງຈະໂສດເຮົາກໍສາມາດມີຄວາມສຸກໄດ້ເດີ້ສາວໆ ມາເບິ່ງກັນບໍ່ວ່າຂໍ້ດີຂອງຄົນໂສດໆຄືເຮົານີ້ ມີດີຫຍັງແດ່ ບາງເທື່ອອາດຈະເຮັດໃຫ້ສາວໆເຊົານ້ອຍໃຈໄປເລີຍກໍໄດ້ເດີ້

ມີເວລາໃຫ້ກັບຕົວເອງຫຼາຍຂຶ້ນ: ແນ່ນອນວ່າການຢູ່ຄົນດຽວນັ້ນເຮັດໃຫ້ເຮົາມີເວລາທົບທວນ ຫຼືໄດ້ເຮັດໃນສິ່ງທີ່ເຮົາມັກຫຼາຍຂຶ້ນ ເພາະບາງເທື່ອການມີຄົນຮັກນັ້ນກໍເຮັດໃຫ້ເຮົາບໍ່ສາມາດເຮັດບາງສິ່ງບາງຢ່າງໄດ້ຕາມທີ່ໃຈເຮົາຢາກເຮັດ ອາດຈະເປັນເພາະວ່າອີກຝ່າຍໜຶ່ງບໍ່ມັກ ຫຼືບໍ່ເຫັນດີນໍານັ້ນເອງ ເພາະສະນັ້ນ ສາວໂສດ ຫຼືຄົນທີ່ຫາກໍກັບມາເປັນໂສດທັງຫຼາຍເອີ້ຍ ໄດ້ເວລາ Enjoy ກັບຊີວິດແລ້ວ ບໍ່ວ່າຈະຢາກເຮັດຫຍັງກໍຕາມ ທີ່ຕອນມີແຟນຢູ່ແລ້ວບໍ່ໄດ້ເຮັດ ຢາກຈະ Party ແບບສຸດຫວ່ຽງພຽງໃດ ກໍລຸຍໄດ້ເລີຍຕອນນີ້ ບໍ່ມີໃຜຫ້າມແນ່ນອນ

ມີເງິນເຫຼືອໄວ້ທ້ອນ: ເວົ້າໄດ້ເລີຍວ່າຕອນມີແຟນ ບຶດກະພາກັນອອກໄປທ່ອງທ່ຽວນີ້ນັ້ນ ບຶດກະພາກັນໄປເບິ່ງໜັງ, ໄປກິນເຂົ້າ ລວມທັງຊື້ຂອງຂວັນໃຫ້ໃນໂອກາດພິເສດຕ່າງໆ ພໍສາວໆໂສດເທົ່ານັ້ນແຫຼະ ຈະຮູ້ວ່າເງິນເຫຼືອໃຫ້ທ້ອນອີກຫຼາຍເລີຍ ດັ່ງນັ້ນ ຕອນນີ້ກໍເປັນນາທີທອງ ເປັນໄລຍະກອບໂກຍເງິນຄໍາຂອງສາວໂສດເລີຍລະ ວ່າບໍ່?

ໃຊ້ເວລາຢູ່ກັບຄົນອ້ອມຂ້າງຫຼາຍຂຶ້ນ: ຕອນມີແຟນກໍຢາກໃຊ້ເວລາຢູ່ກັບແຟນ ເຮັດຕົວຕິດກັນຕະຫຼອດຈົນບາງເທື່ອໝູ່ເພື່ອນກໍເກືອບຈະລືມໜ້າກັນໄປໝົດ ໄລຍະທີ່ໂສດນີ້ລະ ທີ່ຈະໄດ້ມີເວລາຢູ່ກັບຄົນອ້ອມຂ້າງຫຼາຍຂຶ້ນ ບໍ່ວ່າຈະເປັນຄອບຄົວ, ຍາດຕິພີ່ນ້ອງ ຫຼືແມ່ນແຕ່ໝູ່ເພື່ອນເອງກໍຕາມ ເຊື່ອເລີຍວ່າຢູ່ກັບພວກເຂົາແລ້ວຄວາມເຫງົາຈະຫຼາຍໄປແບບອັດຕະໂນມັດ

ໃສ່ໃຈຕົວເອງຫຼາຍຂຶ້ນ: ບໍ່ແມ່ນວ່າຕອນມີແຟນຈະບໍ່ເບິ່ງແຍງຕົວເອງໃດ໋ ແຕ່ຫຼາຍຄົນອາດຈະເຄີຍໄດ້ຍິນປະໂຫຍກທີ່ວ່າ “ໂສດແລ້ວງາມຂຶ້ນໃດ໋ເນາະ” ຈາກຄົນອ້ອມຂ້າງແມ່ນບໍ່ລະ ຂອງແບບນີ້ກໍແນ່ນອນຢູ່ແລ້ວ ກໍເພາະວ່າຕອນໂສດນີ້ແຫຼະເປັນໄລຍະທີ່ບໍາລຸງ ເບິ່ງແຍງຕົວເອງຢ່າງເຕັມທີ່ ເບິ່ງຕົວຢ່າງພວກດາລາທີ່ໂສດແມະ ມີແຕ່ງາມຂຶ້ນງາມຂຶ້ນ ເພາະສະນັ້ນ ຢ່າມົວແຕ່ນັ່ງໂຊມຈົມຢູ່ກັບນໍ້າຕາ ລຸກຂຶ້ນມາ Enjoy ກັບຊີວິດກັນເທາະ

ມີເປົ້າໝາຍທີ່ຈະແຈ້ງ: ສັງເກດບໍ່ວ່າໄລຍະທີ່ມີແຟນ ອີກຝ່າຍໜຶ່ງຈະຄອຍຊ່ວຍເຫຼືອ ເຮັດນັ້ນນີ້ໃຫ້ຢູ່ສະເໝີ ແລ້ວເຮົາຈະແຕ້ມຝັນ ແລະ ຍຶດຕິດຢູ່ກັບອີກຝ່າຍໂດຍອັດຕະໂນມັດ ແຕ່ເມື່ອຖອຍອອກມາຢູ່ຄົນດຽວອີກຄັ້ງ ມັນຈະເປັນໂອກາດທີ່ເຮັດໃຫ້ເຮົາເບິ່ງເຫັນໄດ້ກວ້າງຂຶ້ນ ມີເປົ້າໝາຍທີ່ຈະແຈ້ງ ຮູ້ຈັກການວາງແຜນໃນການໃຊ້ຊີວິດ ທັງຍັງສາມາດເຮັດສິ່ງຕ່າງໆໄດ້ດ້ວຍຕົວເອງຢ່າງກະຕືລືລົ້ນນໍາອີກ

ເຫັນບໍ່ສາວໆ ວ່າການເປັນໂສດມັນບໍ່ໄດ້ຮ້າຍແຮງຄືທີ່ຄິດໄວ້ດອກ ເພາະສະນັ້ນສາວໂສດທັງຫຼາຍກໍຢ່າຟ້າວນ້ອຍໃຈຕໍ່ໂຊກຊະຕາຂອງຕົວເອງເດີ້ ເຊື່ອເທາະວ່າ ຖ້າເຈົ້າຮັກ ແລະ ເຮັດຕົວເອງໃຫ້ດີ ມີຄຸນຄ່າເສຍກ່ອນ ຈັກມື້ໜຶ່ງກໍຈະຕ້ອງມີຄົນດີໆຍ່າງເຂົ້າມາຫາເຈົ້າຢ່າງແນ່ນອນ

admin

error: Content is protected !!